
Өнөөдрийн хөрөнгө оруулалт — маргаашийн боломж

Өнгөрсөн долоо хоногт олон улсын хөрөнгийн зах зээл болон эдийн засгийн орчинд өрнөсөн чухал үйл явдлуудаас дараах гурван сэдвийг онцлон хүргэж байна.
Ойрх Дорнодын мөргөлдөөн: Газрын тосны үнэ ба инфляцын дарамт
NVIDIA (NVDA): Удирдлагын өөрчлөлт ба технологийн салбарын савлагаа
Bitcoin: Дөрвөн сарын доод түвшин рүү унасан шалтгаанууд
Ойрх Дорнод дахь мөргөлдөөн дэлхийн эрчим хүчний зах зээлд нөлөөлж, газрын тосны үнийн өсөлтөөр дамжин инфляцын дарамтыг нэмэгдүүлсэн хэвээр байна. Олон улсын эрчим хүчний агентлагийн (IEA) мэдээлснээр, Ираны дайны улмаас газрын тосны үнэ өссөнтэй холбоотойгоор ОХУ-ын газрын тос болон нефтийн бүтээгдэхүүний экспортын орлого 10 дугаар сард өнгөрсөн тавдугаар сараас хойших хамгийн өндөр түвшинд хүрчээ.

Эрчим хүчний нийлүүлэлтийн тасалдал, тээвэрлэлтийн зардлын өсөлт нь бараа, бүтээгдэхүүний үнэд нөлөөлж, АНУ-ын 10 дугаар сарын үйлдвэрлэгчийн үнийн индекс (PPI) жилийн дүнгээр 2022 оноос хойших хамгийн өндөр хурдаар өссөн байна. Инфляцын дарамт өндөр хэвээр байгаа нь Холбооны нөөцийн банк мөнгөний хатуу бодлогоо үргэлжлүүлэх шаардлагыг нэмэгдүүлж байна.
Гэсэн хэдий ч сүүлийн хоёр долоо хоногт газрын тосны үнэ буурах хандлага ажиглагдаж, Brent төрлийн газрын тосны үнэ баррель нь $95 орчимд хүрчээ. Энэ нь нийлүүлэлтийн нөхцөл сайжрах хүлээлтийг илэрхийлж байгаа ч геополитикийн тодорхойгүй байдал хэвээр байна.
Ийм нөхцөлд АНУ-ын Ерөнхийлөгч Дональд Трамп, БНХАУ-ын дарга Ши Жиньпин болон ОХУ-ын Ерөнхийлөгч Владимир Путин нар 11 дүгээр сарын 19-нд БНХАУ-ын Шэньжэнь хотод болох APEC-ийн дээд хэмжээний уулзалтын үеэр гурван талт уулзалт хийхээр төлөвлөж байгааг Цагаан ордон мэдээллээ.

Уулзалтаар цөмийн зэвсгийг бууруулах асуудал, Ираны мөргөлдөөнийг намжаах боломжийг хэлэлцэхээр хүлээгдэж байна. Үүнээс гадна АНУ, БНХАУ-ын худалдааны тариф, хиймэл оюун ухааны технологийн өрсөлдөөн болон Тайванийн асуудал зэрэг хоёр улсын харилцааны гол сэдвүүд анхаарлын төвд байх төлөвтэй байна.
Гурван талт уулзалт нь геополитикийн эрсдэлийн цаашдын чиглэлийг тодорхойлох чухал үйл явдал болж магадгүй юм. Ялангуяа Ираны мөргөлдөөнийг намжаах талаар ахиц гарвал газрын тосны үнэ, тээвэрлэлтийн зардал буурч, дэлхийн инфляцын дарамт саарах боломжтой. Энэ нь цаашлаад АНУ-ын мөнгөний бодлогын хүлээлт болон олон улсын хөрөнгийн зах зээлийн хөдөлгөөнд нөлөөлөхөөр байна.
NVIDIA компанийн гүйцэтгэх захирал Женсен Хуан албан тушаалаасаа чөлөөлөгдсөнтэй холбоотой мэдээлэл технологийн салбарын хөрөнгө оруулагчдын анхаарлын төвд байлаа. Удирдлагын өөрчлөлттэй холбоотой тодорхойгүй байдлын улмаас NVIDIA-ийн зах зээлийн үнэлгээ өнгөрсөн долоо хоногт 500 тэрбум гаруй ам.доллараар буурсан байна.
Гэсэн хэдий ч Financial Times-ийн мэдээлснээр Женсен Хуан компанийн удирдлагад эргэн ирэх боломжийн талаар хэлэлцэж байгаа нь зах зээлд шинэ хүлээлт үүсгээд байна.
Нөгөө талаас NVIDIA-ийн хувьцааны уналт нь хагас дамжуулагчийн салбарыг бүхэлд нь хамраагүй байна. AI чипийн эрэлт тогтвортой хэвээр байгаатай холбоотойгоор хөрөнгө оруулагчдын сонирхол AMD, Micron зэрэг бусад үйлдвэрлэгчид рүү шилжих хандлага ажиглагджээ.
Энэ долоо хоногт NVIDIA-ийн санхүүгийн тайлан нийтлэгдэхээр хүлээгдэж байгаа бөгөөд компанийн удирдлагын асуудал, AI дэд бүтцийн эрэлт болон цаашдын орлогын төсөөлөл хөрөнгө оруулагчдын анхаарлын төвд байх төлөвтэй байна.

Криптовалютын зах зээлд сүүлийн долоо хоногуудад үргэлжилсэн уналт өнгөрсөн амралтын өдрүүдэд улам эрчимжиж, Bitcoin-ийн ханш 62,000 ам.доллар орчимд хүрч, сүүлийн дөрвөн сарын доод түвшинд хүрсэн байна. Улмаар 11 дүгээр сарын 16-ны Даваа гарагт ханш бага зэрэг сэргэж, 65,000 ам.доллараас доогуур түвшинд арилжаалагдаж байна.
Ханшийн уналтад өнгөрсөн сард гарсан Binance биржийн томоохон хакерын халдлагаас гадна геополитикийн тодорхойгүй байдал, ам.долларын ханшийн өсөлт болон АНУ-ын Засгийн газрын бондын өгөөжийн нэмэгдэл зэрэг хүчин зүйлс нөлөөлжээ.
Тухайлбал, АНУ-ын 10 жилийн хугацаатай Засгийн газрын бондын өгөөж өнгөрсөн долоо хоногт 0.28 нэгж хувиар өсөж, 5.14%-д хүрсэн нь 2025 оны 4 дүгээр сараас хойших хамгийн огцом долоо хоногийн өсөлт боллоо.
Үүнээс гадна ханшийн уналтын үеэр хөшүүрэгтэй long позициуд албадан хаагдсан нь борлуулалтын дарамтыг нэмэгдүүлж, Bitcoin-ийн ханшийн савлагааг улам эрчимжүүлжээ.
Ам.долларын ханш болон бондын өгөөж өндөр хэвээр байх нь криптовалют зэрэг өндөр эрсдэлтэй хөрөнгийн үнэд богино хугацаанд дарамт учруулах эрсдэлтэй байна.

Геополитикийн тодорхойгүй байдал, инфляцын дарамт болон мөнгөний хатуу бодлогын төлөвөөс шалтгаалан олон улсын хөрөнгийн зах зээлд эрсдэл өндөр хэвээр байна. Энэ долоо хоногт хөрөнгө оруулагчдын анхаарал дараах гурван гол үйл явдалд төвлөрөхөөр байна.
1. Гурван талт уулзалт: 11 дүгээр сарын 19-нд АНУ, БНХАУ, ОХУ-ын удирдагчид уулзаж, геополитик болон олон улсын харилцааны чухал асуудлуудыг хэлэлцэхээр төлөвлөж байна. Уулзалтаас гарах шийдвэр, мэдэгдлүүд нь газрын тос, валют болон хөрөнгийн зах зээлд мэдэгдэхүйц савлагаа үүсгэж болзошгүй юм.
2. NVIDIA-ийн санхүүгийн тайлан: Мягмар гарагт NVIDIA улирлын санхүүгийн тайлангаа танилцуулахаар хүлээгдэж байна. Өнгөрсөн долоо хоногт компанийн дараагийн гүйцэтгэх захирал хэн болох нь хөрөнгө оруулагчдын анхаарлын төвд байсан бол одоо Женсен Хуан удирдлагын албан тушаалдаа эргэн ирэх эсэх асуудал гол хүлээлт болоод байна. Тайлангийн үр дүн болон удирдлагын талаарх шинэ мэдээлэл нь технологийн салбарын хувьцааны ханшид хүчтэй нөлөөлж болзошгүй.
3. Anthropic (ANT)-ийн IPO: 11 дүгээр сарын 19-нд Anthropic компанийн хувьцааны хоёрдогч зах зээлийн арилжаа эхлэхээр хүлээгдэж байна. IPO-ийн урьдчилсан захиалгын эрэлт санал болгож буй хувьцааны хэмжээнээс хэд дахин давсан нь хөрөнгө оруулагчдын сонирхол өндөр байгааг харуулж байна. Гэхдээ эрэлт өндөр байгаа нь арилжааны эхний өдрийн ханш өсөх баталгаа биш бөгөөд өндөр савлагаа үүсэх эрсдэлтэйг анхаарах хэрэгтэй.
Та Anthropic компанийн хоёрдогч зах зээлийн эхний өдрийн арилжаанд оролцох сонирхолтой бол ЭНД дарж бүртгэлийн маягтыг бөглөнө үү.