Судалгаа
• Гадаад арилжаа
Өнөөдрийн хөрөнгө оруулалт — маргаашийн боломж
Энэхүү судалгаанд ашигласан дата болон тоон мэдээллийг олон улсын институционал хөрөнгө оруулагчид, болон хөрөнгө оруулалтын шинжээчдийн өргөн ашигладаг Bloomberg Terminal платформоос авсан болно. Судалгаанд дурдсан ETF-үүд нь зах зээлийн нөхцөл байдал, салбарын төлөв болон холбогдох мэдээлэлд үндэслэн боловсруулсан шинжилгээний хүрээнд санал болгож буй хөрөнгө оруулалтын боломжууд юм.
Хөрөнгө оруулагчид өөрсдийн хөрөнгө оруулалтын зорилго, эрсдэл даах чадвар болон өгөөжийн хүлээлтэд нийцүүлэн нэмэлт судалгаа хийж, хөрөнгө оруулалтын шийдвэрээ бие даан гаргахыг зөвлөж байна.
Сүүлийн жилүүдэд хиймэл оюун ухааны хэрэглээ эрчимтэй нэмэгдэж байгаа нь дата төвүүдийн цахилгаан дэд бүтцийн эрэлтийг огцом өсгөж байна. Bloomberg Intelligence (BI)-ийн тооцоолсноор энэ зах зээл 2025 оны түвшнээс хоёр дахин тэлж, 2030 он гэхэд 117 тэрбум ам.долларт хүрэх төлөвтэй байна. Ийнхүү AI-д шаардлагатай өндөр хүчин чадал бүхий дата төвүүд олноор нэмэгдэхийн хэрээр цахилгаан хангамж, хөргөлт болон холбогдох дэд бүтцийн шийдэл нийлүүлэгч компаниудад сүүлийн хэдэн арван жилд тохиож буй хамгийн том өсөлтийн боломжуудын нэг бүрдэж байна.
Цахилгаан хангамж, хөргөлт, тоног төхөөрөмж, үйлчилгээ болон программ хангамжийг хамарсан дата төвийн дэд бүтцийн зах зээл 2030 он хүртэл жилд дунджаар 18%-иар өсөх төлөвтэй байна. Энэхүү өсөлтийн гол хөдөлгөгч хүчин зүйл нь үүлэн тооцоолол болон технологийн томоохон компаниудын дата төвийн хөрөнгө оруулалт нэмэгдэж буй явдал юм. Үүнээс гадна улс орнууд өөрсдийн AI дэд бүтцийг хөгжүүлэхэд анхаарч эхэлсэн нь эрэлтийг улам нэмэгдүүлж байна. Мөн AI тооцооллын хүчин чадал өсөхийн хэрээр дата төвийн бүтэц илүү нарийн, өндөр хүчин чадалтай болж, нэг мегаватт хүчин чадлыг бий болгоход шаардагдах тоног төхөөрөмж, үйлчилгээний хэмжээ болон тэдгээрээс бий болох эдийн засгийн үнэ цэн нэмэгдэж байна.
Дата төвийн дэд бүтцийн зах зээлд ойрын жилүүдэд хамгийн их нөлөө үзүүлэх хүчин зүйл нь Nvidia-ийн хөгжүүлж буй 800 VDC цахилгаан хангамжийн төхөөрөмж 2027 оноос бодит дата төвүүдэд өргөнөөр ашиглагдаж эхлэх магадлалтай юм. Энэхүү системд шаардлагатай хатуу төлөвтэй шилжүүлэгч, хувьсах гүйдлийг тогтмол гүйдэл болгон хувиргах дамжуулагч төхөөрөмж, тогтмол гүйдлийн хамгаалалтын системүүдийн найдвартай ажиллагаа батлагдвал дата төвийн хөрөнгө оруулалт уламжлалт тоног төхөөрөмжөөс илүү өндөр хүчдэлтэй, дэвшилтэт цахилгаан шийдлүүд рүү шилжих төлөвтэй байна. Ялангуяа хатуу төлөвт трансформатор болон дамжуулагч төхөөрөмж-д суурилсан шийдлүүдийн аль нь илүү өргөн хэрэглээнд нэвтрэхээс шалтгаалан тоног төхөөрөмж үйлдвэрлэгчдийн зах зээлийн байр суурь өөрчлөгдөж болзошгүй.
Гэхдээ AI дата төвийн өсөлтийг зөвхөн технологийн хөгжил тодорхойлохгүй. Цахилгаан сүлжээнд холбогдох хугацаа уртсаж байгаа, трансформаторын нийлүүлэлт хүрэлцэхгүй байгаа болон цахилгаан эрчим хүчний хэрэгцээ эрчимтэй нэмэгдэж байгаа нь шинэ дата төвүүдийг ашиглалтад оруулахад гол саад болж буй асуудал юм.
Тиймээс:
Шаардлагатай түүхий эдийн зөвшөөрлийн үйл явцыг хурдасгах
дата төв өөрийн талбай дээр эрчим хүч үйлдвэрлэх
батарей хуримтлуур ашиглах
эрчим хүчний компаниудтай хамтран ажиллах зэрэг шийдлүүдийн ач холбогдол нэмэгдэнэ.
Хэрэв цахилгаан эрчим хүчний хомсдол үргэлжилбэл хөрөнгө оруулалт нь зөвхөн шинэ хүчин чадал барихаас илүү эрчим хүчний хэрэглээг оновчтой удирдах, хянах болон цахилгаан сүлжээтэй уялдуулан нэгдсэн системүүд рүү чиглэх төлөврүү хувирах боломжтой болох юм.
Тоцооллоор AI-аас үүдэлтэй цахилгаан дэд бүтцийн эрэлт 2026 онд 32%-иар өсөх төлөвтэй бөгөөд дата төвийн цахилгаан тоног төхөөрөмжийн зах зээл 2030 он гэхэд 117 тэрбум ам.долларт хүрэх боломжтой байна. Энэ өсөлтийн хүрээнд ABB, Eaton болон Siemens-ийн дата төвөөс олох орлого Schneider Electric болон Vertiv-ээс илүү хурдтай өсөх төлөвтэй байна.
AI нь дата төвийн зах зээлийг жилд 18%-иар өсгөнө
Дата төвийн бизнес нь Schneider Electric, Vertiv, ABB болон Eaton зэрэг компаниудын орлого, цаашлаад зах зээлийн үнэлгээнд улам чухал нөлөө үзүүлэх болж байна. BI-ийн компани тус бүрийн орлогод тулгуурласан тооцоогоор дата төвийн цахилгаан тоног төхөөрөмжийн зах зээл 2026 онд 67 тэрбум ам.долларт хүрэх төлөвтэй. Үүнийг AI дата төвийн хүчин чадлын хурдтай өсөлт болон Microsoft, Amazon, Google, Meta зэрэг томоохон технологийн компаниудын дата төвд хийх хөрөнгө оруулалтын мөчлөг эрчимжих хандлагатай хэмээн үзэж байна.
Цаашдын өсөлтөд зөвхөн шинээр баригдах дата төвийн хэмжээ бус, нэг мегаватт хүчин чадалд шаардагдах дэд бүтцийн өртөг нэмэгдэх нь улам чухал хүчин зүйл болж хувирна. Яагаад гэвэл AI серверүүдийн нэг тавиурт төвлөрөх тооцооллын хүчин чадал болон цахилгаан хэрэглээ нэмэгдэхийн зэрэгцээ 2027 онд хэрэглээнд нэвтрэхээр зэхэж буй 800 VDC систем нь илүү өндөр хүчин чадалтай цахилгаан түгээлт, хамгаалалт, хөргөлт болон хяналтын систем шаардана хэмээн мэдэгдсэн билээ.
Иймээс салбарын томоохон компаниуд зөвхөн шинэ бүтээгдэхүүний судалгаа, хөгжүүлэлтэд бус, нийлүүлэлтийн сүлжээ болон үйлдвэрлэлийн хүчин чадлаа нэмэгдүүлэхэд их хэмжээний хөрөнгө оруулж байна. Эдгээр хөрөнгө оруулалтын дийлэнх нь АНУ-д төвлөрч байгаа бөгөөд AI дата төвийн дэд бүтцийн өсөлт АНУ-ын зах зээлд хамгийн хүчтэй өрнөх хүлээлттэй байгааг харуулж байна.
Дата төвийн хүчин чадлын тэлэлт нь аж үйлдвэрийн салбарт AI-тай холбоотой өсөлтийн боломжийг тодорхойлох хамгийн гол хүчин зүйл болж байна. 2030 он хүртэл дата төвийн нийт хүчин чадал 116 ГВт-аар нэмэгдэнэ гэж тооцсон бөгөөд энэ нь нэг мегаватт хүчин чадал тутамд ойролцоогоор 4.1 сая ам.долларын боломжит дэд бүтцийн зардал бий болгохоор байна.
Хөрөнгө оруулагчид дата төвийн бүтээн байгуулалт эрчимтэй үргэлжилнэ гэсэн өөдрөг хүлээлтийг хувьцааны үнэлгээнд улам ихээр тусгаж байгаа ч эдийн засгийн саатал, инфляц зэрэг нь эрсдэл хэвээр байна. Мөн шинэ цахилгаан архитектур нэвтрэхийн хэрээр зарим уламжлалт тоног төхөөрөмжийн хэрэгцээ багасч, нэг мегаваттад ногдох нийт зардал тодорхой хэмжээгээр буурах боломжтой байх магадлалтай хэмээн үзэж байгаа юм.
Тиймээс зах зээл урт хугацаанд тогтвортой өсөхөд компаниудын хөрөнгө оруулалт, улс орнуудын бие даасан AI дэд бүтцийн төслүүд болон дата төвүүдийн бүтээн байгуулалт үргэлжлэн нэмэгдэх нь хамгийн чухал нөхцөл хэвээр байна.
Хөрөнгө оруулагчдын хувьд шинэ тоног төхөөрөмжийн аль технологи илүү өргөн нэвтрэхийг таамаглахаас илүүтэй дата төвийн барилгын төслийн дараалал, төлөвлөсөн хүчин чадал болон компаниудын капиталын зардлын төлөвлөгөөг хянах нь илүү чухал гэж тайланд онцолжээ.
NVIDIA: AI чипний зах зээлийн 80%-аас дээш хувийг ганцаараа эзэлж буй үнэмлэхүй тэргүүлэгч.
AMD: NVIDIA-ийн гол өрсөлдөгч бөгөөд тэдний шинэ загварын цуврал AI хурдасгуурууд зах зээлд хүчтэй байр суурь эзэлж байгаа.
SUPER MICRO COMPUTER: AI сервер угсралтаараа хамгийн хурдацтай өсөж буй компани. Шингэн хөргөлтийн системийг сервертээ шууд нэгтгэдгээрээ давуу талтай.
Dell Technologies: Уламжлалт серверийн гигантууд бөгөөд одоо томоохон корпорацуудад зориулсан "AI Factories" буюу бэлэн AI дата төвийн серверүүдийг нийлүүлж байна.
Schneider Electric: Дата төвийн эрчим хүчний хуваарилалт болон Motivair компанийг авснаар шингэн хөргөлтийн зах зээлд маш хүчтэй тэргүүлэгч болсон.
Vertiv Holdings: AI дата төвийн хөргөлт болон эрчим хүчний менежментийн хамгийн том тоглогч. NVIDIA-ийн албан ёсны дэд бүтцийн түнш.
Eaton Corporation: Цахилгаан эрчим хүчний хуваарилалт, хяналтын систем болон ухаалаг сүлжээний тоног төхөөрөмжөөр тэргүүлэгч.
Дата төвийн барилга угсралт, инженерийн зардал 2026 онд 32%-иар өсөж, 96 тэрбум ам.долларт хүрэх төлөвтэй байгаа бөгөөд энэхүү тооцоолол нь 2026 онд дата төвүүдийн цахилгаан эрчим хүчний эрэлт 18 ГВт-аар нэмэгдэнэ гэсэн таамаглалд тулгуурласан байна.
Нэг мегаватт хүчин чадал бий болгоход дунджаар 8.4 сая ам.долларын барилгын зардал шаардлагатай гэж үзвэл 2025 онд ойролцоогоор 14.4 ГВт шинэ хүчин чадал нэмэгдсэн гэсэн тооцоо гарч байна.
Үүгээр ч зогсохгүй 2026–2030 онд дата төвийн цахилгаан эрчим хүчний шинэ эрэлт нийт 116 ГВт-аар нэмэгдэх бөгөөд жилийн нэмэгдэл 2030 онд 28 ГВт-д хүрч оргилдоо хүрэх төлөвтэй байна.
Дата төвийн бүтээн байгуулалтад тулгарч буй саад бэрхшээлүүдэд зөвхөн тоног төхөөрөмжийн нийлүүлэлт болон цахилгаан сүлжээний холболтоор хязгаарлагдахгүй бөгөөд усны нөөц болон шаардлагатай ашигт малтмалын хүртээмж зэрэг асуудлуудыг хамрах болжээ. Энэхүү саад бэрхшээлүүдийг үндэслэн барилга, инженерчлэлийн салбарын зардал цаашид жилд дунджаар 20%-иар өсөх төлөвтэй байна.
Дүгнэлт: Нэг мегаватт хүчин чадалд ойролцоогоор 4.1 сая ам.долларын цахилгаан болон дэд бүтцийн боломжит зардал ногдож байгаа нь шинэ хүчин чадал нэмэгдэх тусам тоног төхөөрөмж нийлүүлэгчдийн орлогын боломж мөн өсөхийг харуулж байна.
Нэг серверийн тавиурын хүчин чадал цаашид 1 МВт орчимд хүрэх боломжтой тул уламжлалт агаарын хөргөлтөөс шингэн хөргөлт рүү шилжих хандлага эрчимжиж байна. Энэ нь хөргөлтийн тоног төхөөрөмж, эрчим хүчний хяналт, удирдлагын систем болон нэгдсэн дэд бүтцийн эрэлтийг нэмэгдүүлэхээр байна.
Ерөнхийдөө AI дата төвийн хөрөнгө оруулалтын дараагийн үе шат нь “илүү олон GPU” гэхээс илүүтэйгээр “илүү их цахилгаан, илүү сайн хөргөлт, илүү ухаалаг эрчим хүчний удирдлага” руу шилжиж байна. Энэ өөрчлөлт нь цахилгаан дэд бүтцийн компаниудыг AI хөрөнгө оруулалтын урт хугацааны гол ашиг хүртэгчдийн нэг болгох боломжтой.
Технологийн өөрчлөлтийг дагасан өсөлтийн боломжид хөрөнгө оруулах хэрэгслүүдийн хүрээнд хиймэл оюун ухаан, технологийн компаниудад төвлөрсөн “CHAT” ETF, мөн эрчим хүч, цахилгаан сүлжээний дэд бүтцийн хөгжилд чиглэсэн “GRID” ETF-ийг санал болгож байна.
CHAT ETF: Roundhill Generative AI & Technology ETF (CHAT) нь хиймэл оюун ухаан, үүлэн тооцоолол, хагас дамжуулагч болон AI технологийн хөгжлөөс ашиг хүртдэг компаниудад төвлөрсөн байдаг тул технологийн салбарын өсөлтөд оролцох боломж олгоно.
GRID ETF: ”First Trust Nasdaq Clean Edge Smart Grid Infrastructure ETF” (GRID) нь цахилгаан сүлжээ, эрчим хүчний дэд бүтэц, цахилгаан тоног төхөөрөмж болон дата төвүүдийн өсөн нэмэгдэж буй эрчим хүчний хэрэгцээг хангахад оролцдог компаниудад хөрөнгө оруулдаг. AI болон дата төвийн эрэлт нэмэгдэхийн хэрээр цахилгаан эрчим хүч, сүлжээний шинэчлэлийн хэрэгцээ мөн өсөж байгаа нь GRID ETF-ийн урт хугацааны өсөлтийн боломжийг дэмжиж байна.
*Хөрөнгө оруулалтын шийдвэр гаргахын өмнө заавал мэргэжлийн хөрөнгө оруулалтын зөвлөхөөс зөвлөгөө авч, тухайн шийдвэрийн эрсдэлийг бүрэн ойлгохыг зөвлөж байна. Энэхүү судалгаа нь зөвхөн мэдээ, мэдээллийн зориулалттай бөгөөд аливаа хөрөнгө оруулалтын баталгаа өгөх зорилготой бус юм. Хөрөнгө оруулах эсэх шийдвэрийг та өөрийн судалгаа, үнэлгээнд тулгуурлан бие даан гаргаарай.