Судалгаа
• Гадаад арилжаа
Өнөөдрийн хөрөнгө оруулалт — маргаашийн боломж
Claude хиймэл оюуны системийг хөгжүүлэгч Anthropic компани Nasdaq биржид хувьцаагаа олон нийтэд санал болгохоор бэлтгэж байна. Орлогын огцом өсөлт, олон зуун тэрбум ам.долларын тооцоолох дэд бүтцийн гэрээ, их хэмжээний нягтлан бодох бүртгэлийн алдагдал зэрэг нь тус компанийн IPO-г хөрөнгө оруулагчдын анхаарлын төвд орууллаа.
АНУ-ын хиймэл оюуны технологийн тэргүүлэгч компаниудын нэг Anthropic 2026 оны 10 дугаар сарын 26-нд АНУ-ын Үнэт цаас, биржийн хороонд (SEC) S-1 бүртгэлийн баримт бичгээ албан ёсоор хүргүүлж, Nasdaq Global Select Market-д ANT тикерээр бүртгүүлэх хүсэлт гаргалаа.
Хувьцааны санал болгох тоо хэмжээ болон IPO үнэ одоогоор эцэслэгдээгүй байна. Гэсэн хэдий ч компанийн зах зээлийн үнэлгээ 1.5–2.0 их наяд ам.долларт хүрч болзошгүй гэсэн хүлээлт үүссэн нь тус арилжааг хөрөнгийн зах зээлийн түүхэн дэх хамгийн том IPO-уудын нэг болох боломжтойг харуулж байна. Эдгээр үнэлгээ нь батлагдсан санал болгох үнэ бус, зах зээлийн урьдчилсан таамаглал юм.
2021 онд OpenAI-ийн судлаач, удирдах албан тушаалтнууд асан Дарио Амодей, Даниэла Амодей тэргүүтэй долоон үүсгэн байгуулагч Anthropic компанийг байгуулжээ. Тус компани хиймэл оюуны аюулгүй байдал, найдвартай ажиллагааны судалгааг технологийн бүтээгдэхүүний арилжааны хөгжилтэй хослуулдгаараа онцлог.
Anthropic нь Delaware мужийн хуулийн дагуу Public Benefit Corporation (PBC) хэлбэрээр байгуулагдсан. Өөрөөр хэлбэл, компанийн засаглалын зорилго нь зөвхөн хувьцаа эзэмшигчдийн санхүүгийн өгөөжийг нэмэгдүүлэх бус, хиймэл оюуны хөгжлөөс үүдэх нийгмийн эрсдэлийг харгалзахад оршдог.
Anthropic-ийн өрсөлдөх стратеги нь хэрэглэгчдэд зөвхөн асуултад хариулдаг хиймэл оюун санал болгох бус, байгууллагын ажлын процессыг бүрэн гүйцэтгэх боломжтой технологийн платформ бий болгоход чиглэж байна.
Тус компанийн бүтээгдэхүүн, үйлчилгээ гурван үндсэн түвшинд хөгжиж байна.
Суурь загварын түвшин — Claude Models: Opus, Sonnet, Haiku цуврал нь логик дүгнэлт, програмчлал, мэдээлэл боловсруулах зэрэг даалгаврыг өөр өөр хүчин чадал, өртгөөр гүйцэтгэдэг.
Хөгжүүлэгчийн платформ — API ба Agent: Байгууллагууд Claude-ийн загваруудыг өөрийн программ хангамжид нэгтгэж, автоматжуулсан агент болон тусгай шийдэл хөгжүүлдэг.
Байгууллагын хэрэглээ — Claude Code, Cowork: Код бичих, санхүүгийн шинжилгээ хийх, тайлан боловсруулах, байгууллагын өгөгдөлтэй ажиллах зэрэг бодит ажлуудыг гүйцэтгэнэ.
Anthropic орлогоо API ашиглалтын төлбөр, байгууллагын захиалгат үйлчилгээ, хиймэл оюуны агентууд болон программ хангамжийн интеграцийн шийдлээр бүрдүүлдэг.
2026 оны эхний хагас жилийн байдлаар нийт орлогын ойролцоогоор 80% нь ашиглалтад суурилсан төлбөрөөс, үлдсэн 20% нь захиалгын үйлчилгээнээс бүрджээ. Энэ нь орлого нь хэрэглэгчдийн хиймэл оюуныг бодитоор ашиглаж буй хэмжээнээс ихээхэн хамааралтайг илтгэнэ.
Claude Code: Өсөлтийн гол хөдөлгөгч хүч
Anthropic-ийн хамгийн өндөр өсөлтийн боломжтой чиглэлүүдийн нэг нь Claude Code юм. Энэхүү бүтээгдэхүүн нь программ хөгжүүлэгчдэд код бичих, засварлах, алдаа илрүүлэх, тест хийх, программын бүтцийг сайжруулах ажлыг автоматжуулах боломж олгодог.
Уламжлалт хиймэл оюуны туслахууд хэрэглэгчид зөвлөгөө, кодын жишээ санал болгодог байсан бол Claude Code болон бусад агентын шийдлүүд ажлыг шууд гүйцэтгэхэд чиглэж байна.
Энэ нь Anthropic-ийн хувьд чухал хоёр боломж бий болгодог. Нэгдүгээрт, байгууллагын ажлын процесст гүнзгий нэвтэрснээр хэрэглэгчээ удаан хугацаанд хадгалах боломж нэмэгдэнэ. Хоёрдугаарт, автоматжуулж буй ажлын хэмжээ өсөхийн хэрээр API хэрэглээ, улмаар компанийн орлого нэмэгдэх боломжтой.
Anthropic-ийн IPO-ийн хамгийн их анхаарал татаж буй үзүүлэлт нь орлогын өсөлт болон тайлагнасан цэвэр алдагдлын хоорондох асар том зөрүү юм.
Орлогын өсөлт: Өмнөх оноос 15 дахин өсөв.
Компанийн улирлын орлого 2025 оны эхний улиралд 376 сая ам.доллар байсан бол 2026 оны хоёрдугаар улиралд 11.56 тэрбум ам.долларт хүрчээ. Өөрөөр хэлбэл, зургаан улирлын хугацаанд улирлын орлого 30 гаруй дахин өссөн байна.
Энэ өсөлтийг байгууллагуудын хиймэл оюуны хэрэглээ нэмэгдэж, Claude-ийн загваруудыг программ хангамж, мэдээллийн үйлчилгээ болон бизнесийн үйл ажиллагаанд өргөнөөр ашиглаж эхэлсэнтэй холбон тайлбарлаж болно. Гэхдээ өндөр өсөлт үргэлж ижил хурдаар хадгалагдахгүй. Компанийн хэмжээ тэлэхийн хэрээр өсөлтийн суурь өндөр болж, шинэ хэрэглэгч татах болон одоогийн хэрэглэгчдийн зарцуулалтыг нэмэгдүүлэх шаардлага улам чухал болно.
80.7 тэрбум ам.долларын алдагдал юунаас үүссэн бэ?
2026 оны эхний хагас жилийн санхүүгийн тайланд Anthropic $80.75 тэрбумын цэвэр алдагдал хүлээсэн нь анх харахад компанийн санхүүгийн тогтвортой байдалд томоохон эргэлзээ төрүүлнэ. Гэвч тайлагнасан алдагдлын дийлэнх хэсэг нь өдөр тутмын үйл ажиллагаанаас үүдэлтэй бодит мөнгөн зарлага бус, харин нягтлан бодох бүртгэлийн стандартын дагуу бүртгэсэн мөнгөн бус зардалтай холбоотой байна.
2026 оны эхний хагас жилд хөрвөх өр, дериватив болон холбогдох хэрэгслийн үнэлгээний өөрчлөлтөөс $72.39 тэрбумын зардал бүртгэсэн нь нийт алдагдлын томоохон хэсгийг тайлбарлаж байна.
Үүний зэрэгцээ компани $3.93 тэрбумын үйл ажиллагааны эерэг мөнгөн урсгал бий болгосон нь санхүүгийн хувьд чухал ахиц юм. Гэхдээ мөнгөн урсгал эерэг болсон нь бүх төрлийн дэд бүтцийн хөрөнгө оруулалт, ирээдүйн гэрээт төлбөрийг бүрэн санхүүжүүлэх чадвартай болсон гэсэн үг биш.
Anthropic-ийн IPO нь зөвхөн хиймэл оюуны салбарын хувьд бус, АНУ-ын хөрөнгийн зах зээлийн түүхэн дэх хамгийн том хувьцааны анхдагч санал болголтуудын нэг болох боломжтой.
Тус компани 2026 оны 6 сарын 1-нд SEC-д IPO-ийн бүртгэлийн баримт бичгийг нууцлалтайгаар хүргүүлсэн бол 10 сарын 26-нд олон нийтэд ил болгожээ. Арилжааг 11 сарын дундуур эхлүүлэхээр зорьж байгаа ч IPO-ийн эцсийн хугацаа, санал болгох үнэ, хувьцааны тоо хараахан батлагдаагүй байна.
Хэрэв Anthropic 1.5 их наяд ам.доллараар үнэлэгдэж, нийт хувьцааны 5%-тай тэнцэх хэмжээг шинээр санал болговол IPO-ийн хэмжээ онолын хувьд $75 тэрбумд хүрэх боломжтой.
IPO-ийн баримт бичигт тусгагдсан засаглалын бүтэц нь хөрөнгө оруулагчдын анхаарах хамгийн чухал асуудлуудын нэг юм. Компанийн 7 үүсгэн байгуулагч Founder LLC хэмээх тусгай байгууллагаар дамжуулан Class F ангиллын хувьцааг эзэмшиж, хувьцаа эзэмшигчдийн ерөнхий санал хураалтын эрхийн 50.1%-ийг хянах зохицуулалттай.
Үүний зэрэгцээ Long-Term Benefit Trust байгууллага Class T ангиллын хувьцаагаар дамжуулан ТУЗ-ийн олонх гишүүнийг сонгох болон чөлөөлөх эрхтэй байна. Ийм бүтэц нь үүсгэн байгуулагчдад богино хугацааны зах зээлийн дарамтаас үл хамааран компанийн урт хугацааны стратегиа хэрэгжүүлэх боломж олгож болох ч энгийн хувьцаа эзэмшигчдийн шийдвэр гаргалтад оролцох нөлөөг хязгаарлах сул талтай.
Хиймэл оюуны салбарын өрсөлдөөн улам ширүүсэж байна. Anthropic-ийн гол өрсөлдөгчид болох OpenAI, Google болон Meta нь технологийн судалгаа, тооцооллын хүчин чадал, байгууллагын хэрэглэгчдийг татах чиглэлээр их хэмжээний хөрөнгө зарцуулж байна.
Anthropic-ийн хувьд программ хөгжүүлэлт болон өндөр үнэ цэнтэй мэргэжлийн ажлын урсгалд төвлөрч байгаа нь ялгарах боломж олгож байна. Гэвч энэхүү давуу тал тогтвортой хадгалагдана гэсэн баталгаа байхгүй. Бусад компаниуд код бичих, автоматжуулсан агент хөгжүүлэх чиглэлд хөрөнгө оруулалтаа нэмэгдүүлснээр загваруудын гүйцэтгэл хоорондын зөрүү багасаж, хэрэглэгчид илүү хямд хувилбарыг сонгох боломжтой болно.
Өрсөлдөөний гол эрсдэл нь хиймэл оюуны загварын хэрэглээ өсөхийн хэрээр нэгж үйлчилгээний үнэ буурах явдал юм. Ийм нөхцөлд компани орлогын өсөлтөө хадгалсан ч ашгийн маржин нь буурах эрсдэлтэй.
Санхүүгийн болон үйл ажиллагааны эрсдэлүүд
- Орлогын өсөлтийн сааралт: Өндөр суурь үзүүлэлтээс шалтгаалан орлогын өсөлтийн хурд саарч байна. II улиралд орлого өмнөх улирлаас хоёр дахин өссөн бол III улиралд өсөлт ойролцоогоор 45% болж буурчээ. Цаашид өсөлтийн хурд огцом саарвал компанийн өндөр зах зээлийн үнэлгээг үндэслэхэд хүндрэл учирч болзошгүй.
- Тооцоолох хүчин чадлын өндөр зардал: Компани 2030-аад он хүртэлх хугацаанд 500 тэрбум ам.доллароос давсан тооцоолох хүчин чадал ашиглах үүрэг хүлээсэн бөгөөд орлогын гүйцэтгэлээс үл хамааран эдгээр төлбөрийн дийлэнх хэсгийг төлөх шаардлагатай. The Wall Street Journal-ийн мэдээлснээр тооцоолох хүчин чадлын нийт зардал 750 тэрбум ам.долларт хүрч болзошгүй байна.
- Гадаад санхүүжилтээс хамаарах байдал: Anthropic анх тооцоолсноосоо эрт нэмэлт санхүүжилт татах шаардлага үүсэж болзошгүйг анхааруулжээ. Хэрэв компани хөрөнгө оруулалтын зэрэглэлийн зээлжих эрхийн үнэлгээ авбал даатгалын компаниуд болон тэтгэврийн сангуудаас хөрөнгө татах боломж нэмэгдэх боловч энэ чиглэлийн тодорхой төлөвлөгөөг холбогдох баримт бичигт тусгаагүй байна.
- Чөлөөт мөнгөн урсгал сөрөг: 2025 оны санхүүгийн жилд компанийн чөлөөт мөнгөн урсгал (FCF) -2.768 тэрбум ам.доллар байсан нь үйл ажиллагаа болон хөрөнгө оруулалтын хэрэгцээгээ дотоод эх үүсвэрээр бүрэн санхүүжүүлэх түвшинд хараахан хүрээгүйг харуулж байна.
Өрсөлдөөн болон бүтцийн эрсдэлүүд
- Нээлттэй жинтэй AI загваруудын өрсөлдөөн: Meta-ийн Llama, DeepSeek зэрэг нээлттэй жинтэй загварууд нь байгууллагуудад бага зардлаар ашиглах, өөрийн хэрэгцээнд тохируулан өөрчлөх, өгөгдлийн хяналтаа хадгалах боломж олгож байна. Энэ нь хаалттай AI загваруудын API үйлчилгээний үнэд дарамт учруулж болзошгүй.
- AI загварын ашиглалтын үйлчилгээний ялгарал буурах эрсдэл: Зардлаа бууруулахыг зорьж буй хэрэглэгчид энгийн даалгавруудаа нээлттэй эхийн эсвэл хямд өртөгтэй загваруудад шилжүүлэх хандлагатай байна. Мөн inference API-ийн стандартчилал нэмэгдэхийн хэрээр AI загваруудыг хооронд нь орлуулахад хялбар болж, үйлчилгээний ялгарах давуу тал буурах эрсдэлтэй.
- Үнийн өрсөлдөөний дарамт: Anthropic компани Opus 5 загварынхаа үнийг өөрийн өндөр түвшний загварын үнээс хоёр дахин бага тогтоосон нь AI салбар дахь үнийн өрсөлдөөн эрчимжиж байгааг харуулж байна.
- Дэд бүтцийн хамаарал: Anthropic нь AI тооцооллын дэд бүтцийн хувьд Amazon болон Google-ээс хамааралтай. Гэвч эдгээр компани өөрсдийн Nova болон Gemini зэрэг харьцангуй хямд өртөгтэй AI загваруудыг зах зээлд санал болгож байгаа нь Anthropic-ийн хувьд нийлүүлэгчидтэйгээ зэрэгцэн өрсөлдөх нөхцөлийг бий болгож байна.
- Хэрэглэгчдийн төвлөрөл болон хадгалалтын эрсдэл: API-д суурилсан орлогын загвар нь хэрэглэгчдээ урт хугацаанд хадгалахтай холбоотой эрсдэл дагуулдаг. Түүнчлэн байгууллагууд AI технологийг өргөн хүрээнд нэвтрүүлэхийн тулд өгөгдлийн дэд бүтцээ шинэчлэх, байгууллагын дотоод үйл ажиллагаа болон удирдлагын тогтолцоонд өөрчлөлт хийх шаардлагатай байдаг.
Компанийн засаглал болон оршин тогтнох түвшний эрсдэлүүд
- Үүсгэн байгуулагчдын хяналт: Class F ангиллын хувьцааны бүтцээр дамжуулан үүсгэн байгуулагчид саналын эрхийн 50.1%-ийг эзэмшиж байгаа нь олон нийтэд хувьцаа эзэмшигчдийн компанийн шийдвэр гаргалтад нөлөөлөх боломжийг хязгаарлаж байна.
- Хиймэл оюун ухаанаас үүдэн хүн төрөлхтөний оршин тогтнох түвшний эрсдэл: IPO-ийн танилцуулга баримт бичигт эрсдэлийн хүчин зүйлсийг тайлбарласан 100 орчим хуудас багтсан бөгөөд үүнд хүн төрөлхтөнд учирч болзошгүй сүйрлийн болон оршин тогтнох түвшний эрсдэлүүдийг дурджээ. Тухайлбал, AI систем өөрийгөө хадгалан хамгаалахыг эрмэлзэх, унтраах үйлдлийг эсэргүүцэх, мэдээллийг санаатайгаар нуун дарагдуулах зэрэг эрсдэлүүдийг онцолсон байна.
- Байгаль орчин болон зохицуулалтын эрсдэл: Дата төвүүдийн өргөтгөл нь цахилгаан, дулааны үйлчилгээний зардал болон байгаль орчинд үзүүлэх нөлөөлөлтэй холбоотой олон нийтийн шүүмжлэлтэй тулгарч байна. Түүнчлэн дата төвүүдийн цахилгаан эрчим хүчний хангамжийг бүрдүүлэхэд зохицуулалтын саад бэрхшээл үүсэж болзошгүйг компанийн баримт бичигт анхааруулжээ.
Anthropic-ийн IPO нь хиймэл оюуны салбарын компаниудыг хөрөнгийн зах зээл хэрхэн үнэлэхийг тодорхойлох чухал үйл явдал болохоор байна. Компанийн орлого 2025 оны эхний улирлын $376 саяас 2026 оны II улиралд $11.56 тэрбумд хүрсэн нь хиймэл оюуны технологийг байгууллагын хэрэглээнд нэвтрүүлэх зах зээлийн эрэлт асар хурдтай өсөж буйг илтгэнэ. Түүнчлэн үйл ажиллагааны мөнгөн урсгал эерэг түвшинд шилжсэн нь компанийн орлогын өсөлт санхүүгийн бодит үр дүнд нөлөөлж эхэлснийг харуулж байна.
Гэсэн хэдий ч олон зуун тэрбум ам.долларын дэд бүтцийн гэрээ, ширүүсэж буй өрсөлдөөн, үйлчилгээний үнийн бууралтын дарамт болон хувьцаа эзэмшигчдийн саналын эрхийн хязгаарлалт нь хөрөнгө оруулагчдын хувьд анхаарах томоохон эрсдэл хэвээр байна. Anthropic-ийн хувьд технологийн өсөлтийн боломжийг зах зээлд хэдийнэ харуулсан. Харин цаашдын гол сорилт нь энэхүү өсөлтийг тогтвортой ашиг, чөлөөт мөнгөн урсгал болгон хувиргаж, их наяд ам.долларын үнэлгээгээ санхүүгийн үр дүнгээр зөвтгөх явдал юм. Иймээс Anthropic-ийн IPO нь зөвхөн нэг компанийн хувьцааны анхдагч санал болголт бус, хиймэл оюуны технологийн эдийн засгийн бодит үнэ цэнийг олон нийтийн хөрөнгийн зах зээлд ил болгох томоохон үйл явдал болно.
Тайлбар: Энэхүү нийтлэл нь 2026 оны 10 дугаар сарын 27-ны байдлаарх мэдээлэлд суурилсан судалгааны материал юм. IPO-ийн үнэ, хувьцааны тоо болон арилжаа эхлэх хугацаа өөрчлөгдөх боломжтой.
Хэрэв та Anthropic PBC компанийн хувьцаанд хөрөнгө оруулах сонирхолтой бол доорх холбоосоор орж, гадаад үнэт цаасны арилжааны нөхцөл, мэдээлэлтэй танилцан гэрээ байгуулж, хувьцаа худалдан авах захиалгаа өгөх боломжтой.