Судалгаа
• Гадаад арилжаа
Өнөөдрийн хөрөнгө оруулалт — маргаашийн боломж
АНУ-ын цахим худалдааны зах зээл 2025 оны $1.86 их наядаас 2030 он гэхэд $2.59 их наяд хүрч, 5 жилийн хугацаанд ойролцоогоор 39%-иар өсөх төлөвтэй байна.
2030 он гэхэд хүнс, үйлчилгээ болон шатахууныг хассан АНУ-ын жижиглэн худалдааны ойролцоогоор 31% нь цахим сувгаар хийгдэх төлөвтэй байна.
AI агентын тусламжтай бүтээгдэхүүн хайх, харьцуулах болон худалдан авалтыг бэлтгэх хагас автомат худалдаа 2030 он гэхэд нийт дижитал гүйлгээний 60 орчим хувьд нэвтрэх боломжтой байна.
Amazon 2030 он гэхэд АНУ-ын цахим худалдааны нийт зах зээлийн ойролцоогоор 32%-ийг эзэлж, дэлхийн барааны нийт үнэ цэнэ нь $1.34 их наяд хүрэх боломжтой байна.
Энэхүү судалгаанд ашигласан дата болон тоон мэдээллийг олон улсын институционал хөрөнгө оруулагчид, болон хөрөнгө оруулалтын шинжээчдийн өргөн ашигладаг Bloomberg Terminal платформоос авсан болно.
Агуулга: АНУ-ын цахим худалдааны зах зээл хиймэл оюун ухаан, AI агент технологи, нийгмийн сүлжээнд суурилсан худалдаа болон онлайн зах зээлийн хөгжлийн нөлөөгөөр дараагийн өсөлтийн үе шатанд шилжиж буйг онцолсон байна. Судалгааны загвараар АНУ-ын цахим худалдааны борлуулалт 2025 онд 1.86 их наяд ам.доллар байсан бол 2030 он гэхэд 2.59 их наяд ам.долларт хүрэх төлөвтэй байна. Энэ нь 2025–2030 оны хооронд нийтдээ ойролцоогоор 39 хувийн өсөлт үзүүлэх бөгөөд жилийн нийлмэл өсөлт нь 7 орчим хувь байхаар тооцоологджээ.
Уг таамаглал нь 2024 оны өмнөх төсөөлөлтэй харьцуулахад буурсан үзүүлэлт юм. Тухайн үеийн төсөөллөөр 2030 оны цахим худалдааны борлуулалтыг 2.9 их наяд ам.долларт хүрнэ гэж тооцож байсан боловч тарифын нөлөө болон цар тахлын үеийн өндөр өсөлт хэвийн түвшинд шилжсэнтэй холбоотойгоор шинэчилсэн төсөөллийг 2.59 их наяд ам.доллар болгон бууруулсан байна. Гэсэн хэдий ч шинэчилсэн төсөөлөл нь цахим худалдааны зах зээл урт хугацаанд тогтвортой өсөх боломжтой хэвээр байгааг харуулж байна.
Amazon нь АНУ-ын цахим худалдааны зах зээлд хамгийн том тоглогч хэвээр бөгөөд 2030 он гэхэд ойролцоогоор АНУ-ын цахим худалдааны 32%, “онлайн худалдаанд суурилсан жижиглэн худалдааны компани” сегментийн 58%-ийг эзлэх төлөвтэй байна. Дижиталд суурилсан компаниудын нийт цахим худалдааны борлуулалт 2030 онд $1.48 их наяд давж, нийт зах зээлийн 57%-иас илүүг бүрдүүлэх боломжтой.
Amazon-ийн гол давуу тал нь зөвхөн хэмжээ биш. 200 сая гаруй үндсэн хэрэглэгч, өргөн захиалга гүйцэтгэлийн сүлжээ, гуравдагч талын худалдааны платформ төлбөрийн экосистем болон AI интеграц нь компанид өрсөлдөгчдөөс ялгарах хүчин зүйл бий болгож байна. Bloomberg Intelligence-ийн тооцоогоор Amazon-ийн дэлхийн барааны нийт үнэ цэнэ 2025–2030 онд жилийн 9.2% жилийн дундаж нийлмэл өсөлт (CAGR)-өөр өсөж $1.34 их наяд хүрэх боломжтой.
Хүнс, үйлчилгээ болон шатахууны борлуулалтыг хассан АНУ-ын жижиглэн худалдаанд цахим худалдааны эзлэх хувь 2025 оны 26.7 хувиас 2030 онд 31 хувьд хүрэх төлөвтэй байна. Өөрөөр хэлбэл, судалгааны таамаглал биелсэн тохиолдолд 2030 он гэхэд АНУ-ын тухайн ангиллын жижиглэн худалдааны ойролцоогоор гуравны нэг нь цахим сувгаар хийгдэх боломжтой байна.
Цахим худалдааны эзлэх хувийн өсөлтийн гол хүчин зүйлд хэрэглэгчдийн дижитал платформ, аппликэйшн болон видео, нийгмийн сүлжээний хэрэглээ нэмэгдэж буй байдал, жижиглэн худалдааны компаниудын хиймэл оюун ухаанд суурилсан хайлт болон бүтээгдэхүүн санал болгох системийн хэрэглээ, мөн жижиг худалдаачдад цахим худалдааны үйл ажиллагаа эрхлэх боломж олгож буй программ хангамжийн платформуудын хөгжил багтаж байна.
Цахим худалдааны дараагийн үеийн өсөлтийн нэг гол хүчин зүйл нь хиймэл оюун ухаанд суурилсан агент технологи гэж үзэж байна. AI агент нь хэрэглэгчийн өгсөн шаардлага, үнэ, брэнд болон бусад сонголтын хүрээнд бүтээгдэхүүн хайх, сонголтыг харьцуулах, худалдан авалтын үйл явцыг бэлтгэх болон тодорхой нөхцөлд худалдан авалтыг гүйцэтгэх боломжтой технологийн шийдэл юм. 2030 он хүртэлх AI худалдааны боломжыг харуулж байна.
Хагас автомат худалдаа-60% : 2030 он гэхэд AI агент бүтээгдэхүүн хайх, сонголт нарийсгах, төлбөрийн үйл явцыг бэлтгэх боловч эцсийн шийдвэрийг хэрэглэгч өөрөө гаргадаг хэлбэр нийт дижитал гүйлгээний 60 орчим хувьд хүрэх боломжтой.
Бүрэн автомат худалдаа-6.2% : Хэрэглэгчийн шууд оролцоогүйгээр AI агент худалдан авалтын шийдвэр гаргаж, гүйлгээг бүрэн гүйцэтгэх хэлбэр цахим худалдааны 6.2 орчим хувийг эзлэх төлөвтэй.
AI агентад суурилсан худалдааны боломж- $500+ тэрбум: Нэг удаагийн зааврын үндсэн дээр AI агент худалдан авалтыг гүйцэтгэх худалдааны хэмжээ 2030 он гэхэд 500 тэрбум ам.доллараас давж, нийт худалдааны ойролцоогоор 20 хувьд хүрэх боломжтой.
Шинэ өрсөлдөгч: Meta 2026 оны 9 сарын 8-нд хэрэглэгчийн өмнөөс олон шатлалт үйлдэл гүйцэтгэх боломжтой Muse AI агентаа танилцуулсан нь цахим худалдааны салбарын өрсөлдөөнийг шинэ чиглэлд шилжүүлэх боломжтой байна. Цахим худалдааны хувьд Muse-ийн хамгийн чухал нөлөө нь хэрэглэгч бүтээгдэхүүн хайж эхлэх цэгийг өөрчлөх боломжтой байгаад оршино. Өнөөдөр хэрэглэгч Amazon, Walmart зэрэг платформд шууд орж бүтээгдэхүүн хайдаг бол AI агент өргөн хэрэглээнд нэвтэрсэн нөхцөлд хэрэглэгч Muse-д шаардлагаа өгч, агент нь олон худалдааны платформын бүтээгдэхүүнийг хайх, харьцуулах, сонгох болон төлбөрийн үйл явцыг гүйцэтгэх боломжтой болно. Энэ нь урт хугацаанд томоохон платформуудын бүтээгдэхүүний хайлт, хэрэглэгчийн өгөгдөл болон сурталчилгааны экосистемд өрсөлдөөний дарамт нэмэгдүүлэх боломжтой.
Цахим худалдааны өрсөлдөөн зөвхөн бүтээгдэхүүний үнэ, сонголтоор бус технологи, захиалга гүйцэтгэл болон өгөгдлийн чанараар тодорхойлогдох хандлага нэмэгдэж байна. Amazon-ийн 2025 оны барааны нийт үнэ цэнэ ойролцоогоор 866 тэрбум ам.доллар байгаа бол Walmart-ийн цахим худалдааны хэмжээ 2019 оны 37 тэрбум ам.доллароос 150 орчим тэрбум ам.долларт хүрсэн нь өрсөлдөөний бүтэц хурдтай өөрчлөгдөж байгааг харуулж байна. eBay-ийн барааны нийт үнэ цэнэ ойролцоогоор 80 тэрбум ам.долларт хүрсэн бол Wayfair, Temu, Shein болон Etsy мөн AI болон логистикийн хөрөнгө оруулалтаар зах зээлд эзлэх байр сууриа нэмэгдүүлэхийг зорьж байна.
Цахим худалдааны салбар урт хугацааны өсөлтийн өндөр боломжтой хэдий ч хувьцааны гүйцэтгэл компани бүрээр ялгаатай байна. 2026 оны 6 дугаар сарын 15-ны байдлаар судалгаанд хамрагдсан АНУ-ын цахим худалдааны 11 компанийн 8 нь он гарснаас хойш S&P 500 индексийн өгөөжөөс хоцорсон байна. Үүнд AI болон технологийн хөрөнгө оруулалтаас үүдэх зардлын өсөлт хөрөнгө оруулагчдын болгоомжлолыг нэмэгдүүлсэн.
Цахим худалдааны салбарын өрсөлдөөнд Amazon, Walmart болон Shopify нь AI-д суурилсан бүтээгдэхүүн хайлт, захиалга баталгаажуулах болон захиалга гүйцэтгэлийн хөгжлөөр тэргүүлэх төлөвтэй байгаа бол eBay, Etsy болон Wayfair нь өөрсдийн төрөлжсөн сегментэд хэрэглэгчийн итгэл, бүтээгдэхүүн илрүүлэлт болон худалдан авах шийдвэрийг дэмжих технологид төвлөрч байна. Ирээдүйд бүтээгдэхүүний өгөгдлийн чанар, хөрвөлтийн хувь болон хүргэлтийн хурд нь зах зээлд эзлэх хувийг тодорхойлох гол үзүүлэлтүүд болохоор байна.
Amazon-ийн хувьд хиймэл оюун ухаан, үүлэн тооцоолол, өөрийн хөгжүүлсэн чип болон логистикт хийж буй хөрөнгө оруулалт нь урт хугацааны өсөлтийг дэмжихээр байна. Bloomberg Intelligence-ийн тооцооллоор компанийн дэлхий даяарх бараа бүтээгдэхүүний нийт борлуулалтын үнэ цэнэ 2030 онд 1.34 их наяд ам.доллар, АНУ дахь бараа бүтээгдэхүүний нийт борлуулалтын үнэ цэнэ 939 тэрбум ам.долларт хүрэх төлөвтэй байна.
Компаниудын зах зээлд өрсөлдөх стратегийн онцлог:
Walmart - Дэлгүүрүүдээ захиалга хурдан бэлтгэж, хүргэлтэд шилжүүлэх жижиг төвүүд болгон ашиглах
Shopify - томоохон худалдаачид болон AI агентад суурилсан худалдааны сегментэд байр сууриа өргөжүүлэх
eBay - Дахин худалдаалах болон сэргээн засварласан бүтээгдэхүүнд
Etsy - Хэрэглэгчийн сонирхол, санаа сэдлээс худалдан авалт руу хөтөлдөг худалдаанд
Wayfair - Хиймэл оюун ухаан болон нэмэгдүүлсэн бодит байдлын технологид тулгуурлан тус тусын зах зээлд өрсөлдөх стратеги хэрэгжүүлж байна.
АНУ-ын цахим худалдааны зах зээл 2030 он хүртэл тогтвортой өсөх төлөвтэй бөгөөд энэхүү өсөлтийн гол хөдөлгөгч хүчин зүйлс нь хиймэл оюун ухаанд суурилсан худалдаа, сошиал худалдаа болон цахим худалдааны платформуудын хөгжил байх төлөвтэй байна. Зах зээлийн өсөлт үргэлжлэхийн зэрэгцээ хэрэглэгчийн бүтээгдэхүүн хайх, сонгох, худалдан авах үйл явц улам автоматжих хандлагатай байна.
Энэ орчинд Amazon, Walmart, Shopify зэрэг хиймэл оюун ухаан, захиалга гүйцэтгэлийн систем, цахим худалдааны платформ болон хэрэглэгчийн өгөгдлийг нэгтгэн ашиглаж чадсан компаниуд зах зээлд өрсөлдөх давуу талтай байх боломжтой. Харин бүтээгдэхүүний буцаалт, логистикийн зардал болон хиймэл оюун ухаанд хийх өндөр хөрөнгө оруулалт нь салбарын ашигт ажиллагаанд нөлөөлөх гол эрсдэлүүд хэвээр байна.
Иймээс цахим худалдааны салбарын дараагийн өсөлтийн үе нь зөвхөн борлуулалтын хэмжээ нэмэгдэхээс бус, хиймэл оюун ухааныг ашиглан хэрэглэгчийн туршлага, худалдан авалтад шилжих хувь болон үйл ажиллагааны үр ашгийг сайжруулж чадах компаниудын өрсөлдөөнөөр тодорхойлогдох төлөвтэй байна.